Máis de 1.500 persoas enchen o Auditorio e lanzan ao BNG como a alternativa galega e de esquerdas para o 20-N

O público ateigou o Auditorio de Galiza
Santiago de Compostela, 15 Outubro 11.- O portavoz nacional do BNG, Guillerme Vázquez, pechou hoxe a Convención Electoral Nacional –á que acudiron máis de 1.500 persoas que ateigaron o Auditorio de Galiza- afirmando que “a solución non é ir máis á dereita. A solución está na alternativa galega e de esquerdas que é o BNG”.

O líder nacionalista perguntou aos asistentes “acaso non sabemos o que fixo Rubalcaba aínda que intente agora xirar cara á esquerda e tamén sabemos o que faría Rajoy, seguirá recortando, saqueando ao pobo e engordando aos especuladores”.
Neste sentido, o portavoz nacional animou ao auditorio a que miren o que está sucedendo en Portugal para saber o que pasaría no Estado español se gobernase o PP e aludiu ao presidente da Xunta cando afirmou “o que fixemos en Galiza é o que vai facer Rajoy en España”
.

A equipa de Galiza
Por iso, Guillerme instou a “fuxir coma do lume do R de Rajoy, Rubalcaba, de recortes e de recapitalización e pensade no G de Galiza e do BNG, a única alternativa posíbel, necesaria e útil para Galiza e para que exista en Madrid e teña tanta forza como vascos e cataláns”.“Mentres outros están contratados por especuladores e pola banca, o contrato do BNG é con Galiza e coa súa maioría social. O país que amamos e no que queremos vivir”, continuou.
“PP e PSOE pretenden seguir cebando coma porcos aos especuladores”, tal e como advertiu Guillerme, “co BNG, que non conten”.
video da intervencion de Guillerme      Ao cadalso da man dos nosos verdugos
“Pretenden que vaiamos cara ao cadalso da man dos nosos verdugos”, advertiu Guillerme, ao tempo que afirmou que non será así, como o demostran milleiros de “profesores, profesoras, nais, pais, estudantes manifestándose polo ensino público, ou as traballadoras e os traballadores que defenden os medios de titularidade pública de Galiza”, dixo en alusión á folga convocada na CRTVG.

“Tamén os milleiros de persoas que pediron unha sanidade pública, aínda que xa sabemos que moitos non a necesitan, como su majestad El-Rei, que para operar o talón foi a unha clínica privada”, afirmou Guillerme.

O líder nacionalista abriu a Convención afirmando que os candidatos e candidatas do BNG “son os únicos cen por cen galegos, made in Galiza e por iso temos a garantía de que van ir traballar por este país coa mesma dignidade que o fixeron Olaia, Jorquera e Pérez Bouza”.
Francisco Jorquera
Pola súa parte, o número un pola Coruña, Francisco Jorquera, debullou as principais propostas do BNG en materia económica como saída social á crise, salientando a defensa doutra política fiscal que persiga a fraude e faga recaer maior presión sobre as rendas máis altas, “hai que rematar coa vergoña de Botín, a quen PPPSOE lle rinden pleitesía mentres defrauda a Facenda con contas millonarias en Suiza”. Asemade, apostou pola redución de gasto superfluo como o gasto militar e reiterou a necesidade dunha banca pública, asegurando que “aínda estamos a tempo da salvar o aforro galego do espolio. O BNG é a alternativa, é quen ten e propón iniciativas ao servizo das maiorías non dos mercados nin dos especuladores”.
Olaia Fernández Davila
Pola súa parte, a número un por Pontevedra, Olaia Fernández Davila, presentou o BNG como garante das políticas sociais fronte aos recortes e puxo como exemplo deste compromiso e do traballo feito neste sentido, a defensa da dación en pago das hipotecas, que PPPSOE rexeitaron hai tan só uns meses no Congreso e preguntouse “se acaso Rubalcaba ministro era irmán xemelgo do Rubalcaba candidato”. Tanto sobre Rubalcaba como sobre o “mago Mariano” consideraron unha mala noticia a primeira vez que o BNG tivo representación en Madrid, explicou, “por iso é necesario movilizarse a prol do BNG o 20 N para volver a darlles unha mala noticia, que o que é malo para eles será unha grande nova para Galiza”
Xosé Manuel Pérez Bouza
O candidato número un do BNG ao Congreso dos deputados, Xosé Manuel Pérez Bouza, afirmou que as Deputacións provinciais deben ser suprimidas “por inoperantes” e servir de “niños políticos” a PP e PSOE.
Bouza insistiu enque o BNG é “unha alternativa útil” para unha nova política financeira, laboral e fiscal que e demais, “aporta outro deseño de Estado” pero para que isto sexa posible -dixo- é necesario que o BNG poda defender Galiza na política estatal.
María Xosé Vega
A número un do BNG por Lugo, María Xosé Vega reclamou“unha reforma electoral que elimine a circunscrición provincial e a desaparición dos umbrais mínimos para acceder ao reparto de representación así como os avais para presentar candidaturas”. A candidata, principio a súa intervención, nun ateigado Auditorio de Galiza, lembrando que a esa mesma hora, “milleiros de persoas en todo o mundo estaban a reclamar os dereitos da cidadanía fronte ás decisións dos mercados financeiros”.
Laura Arjonilla
“Queremos construír unha Galiza xusta e soberana e isto que nos venden non é democracia”.
Mar Pérez Fra
“PP e PSOE comparten a mesma política económica, ao servizo dos mercados. Nacionalismo é sinónimo de democracia real”.
Jessica Fernández Polo
“A única dona do BNG é Galiza e por iso facemos aquí o mesmo ca en Madrid”.
Susana García
“Queren decidir sen contar con nós, pero somos unha nación”.
Ramón González
“Somos nacionalistas e de esquerdas. Queremos vivir do noso traballo, non subvencionados”.
Sandra González
“Non agardemos a que ninguén nos salve. Salvémonos nós, os galegos e as galegas que exercemos como tais”.
Iria Aboi
“PP e PSOE reformaron a Constitución para entregarnos aos mercados e acordan o espolio do noso aforro. Queren máis. Non grazas. Temos que paralos”.
Rosana Pérez
“PP e PSOE arricáronnos un a un os dereitos sociais conquistados durante sécalos para poñelos ao servizo dos causantes da crise”.